افغان کرکټ ټیم نن ماخوستن په اماراتو کې له ایرلنډ سره لوبه کوي

د افغانستان د کرکټ بورډ د رسنیو د برخې مسؤل فرید هوتک وايي: د افغانستان د کرکټ ملي ټيم نن په ابوظبۍ کې له ايرلنډ سره په الف ګروپ کې د کرکټ مسابقه لري.

د هوتک په خبره: افغانستان به په دې ګروپ کې خپله دويمه مسابقه له متحده عرب اماراتو سره په ابوظبۍ کې د دوشنبې په ورځ ترسره کړي.

هغه زیاتوي: درېيمه ګروپي مسابقه به په دوبۍ کې د راتلونکې پنجشنبې په ورځ له ناميبيايي کرکیټ ډلې سره ولري.

په(الف) ګروپ کې افغانستان، ایرلنډ، نامیبیا او کوربه هېواد متحده عربي امارات سره یوځای شوي دي او په (ب)  ګروپ کې به سکاتلنډ، عمان او هالنډ لوبې وکړي.